జైళ్లలో ఖైదీల పునరావాసం, నైపుణ్యాభివృద్ధికి తెలంగాణ జైళ్ల శాఖ మరో కీలక అడుగు వేస్తోంది. ఖైదీలకు ఉపాధి అవకాశాలు కల్పించే లక్ష్యంతో చర్లపల్లి కేంద్ర కారాగారంలో ప్రభుత్వ ఇండస్ట్రియల్ ట్రైనింగ్ ఇన్‌స్టిట్యూట్ (ఐటీఐ) ఏర్పాటు దిశగా సన్నాహాలు వేగవంతం చేసింది.
ఈ ప్రతిపాదిత ఐటీఐ ద్వారా ఖైదీలకు పరిశ్రమల అవసరాలకు అనుగుణంగా సాంకేతిక, వృత్తి నైపుణ్య శిక్షణ అందించి, జైలు నుంచి విడుదలైన అనంతరం వారు సమాజంలో గౌరవప్రదమైన జీవనం సాగించేలా చేయడం లక్ష్యంగా జైళ్ల శాఖ భావిస్తోంది. ఉపాధి అవకాశాలను మెరుగుపరచడంతో పాటు స్వయం ఉపాధి, ఆర్థిక స్వావలంబనకు ఈ శిక్షణ దోహదపడుతుందని అధికారులు పేర్కొంటున్నారు.
ఈ నేపథ్యంలో తెలంగాణ జైళ్ల శాఖ డైరెక్టర్ జనరల్ డాక్టర్ సౌమ్య మిశ్రా హైదరాబాద్‌లోని నేషనల్ స్కిల్ ట్రైనింగ్ ఇన్‌స్టిట్యూట్ (NSTI), **నేషనల్ స్కిల్ ట్రైనింగ్ ఇన్‌స్టిట్యూట్ ఫర్ ఉమెన్ (NSTI-W)**లను సందర్శించారు. ఐటీఐల మౌలిక వసతులు, శిక్షణా విధానాలు, అనుబంధ ప్రక్రియలు, కోర్సుల నిర్వహణ తదితర అంశాలపై ప్రత్యక్షంగా అధ్యయనం చేశారు.
ఈ సందర్భంగా శిక్షణ పొందుతున్న విద్యార్థులు, అధ్యాపకులతో ఆమె ముచ్చటించి వృత్తి విద్య ద్వారా ఉపాధి అవకాశాలు ఎలా మెరుగుపడుతున్నాయో తెలుసుకున్నారు. అలాగే రీజినల్ డైరెక్టర్ (స్కిల్ డెవలప్‌మెంట్ అండ్ ఎంటర్‌ప్రెన్యూర్‌షిప్) మరియు డైరెక్టర్ ఆఫ్ ట్రైనింగ్ రవిచిలుకోటి, ఎన్‌ఎస్‌టీఐ ఫర్ ఉమెన్ జాయింట్ డైరెక్టర్/ప్రిన్సిపాల్ ప్రియలతో సమావేశమై ఐటీఐల నిర్వహణ, పాఠ్య ప్రణాళికలు, సర్టిఫికేషన్ విధానం, ఖైదీల నైపుణ్యాభివృద్ధి కార్యక్రమాలపై సమగ్రంగా చర్చించారు.
అనంతరం డాక్టర్ సౌమ్య మిశ్రా చర్లపల్లి కేంద్ర కారాగారాన్ని సందర్శించి, అక్కడ ఏర్పాటు చేయనున్న ప్రభుత్వ ఐటీఐకి సంబంధించిన సన్నాహక పనులు, మౌలిక సదుపాయాలు, అనుబంధ ప్రక్రియలు, ఇతర ఏర్పాట్లను సమీక్షించారు. ఖైదీల పునరావాసంలో నాణ్యమైన సాంకేతిక విద్య కీలక పాత్ర పోషిస్తుందని పేర్కొంటూ, ఐటీఐని త్వరితగతిన ప్రారంభించేందుకు అవసరమైన చర్యలను వేగవంతం చేయాలని అధికారులను ఆదేశించారు.
ఈ సమీక్షా సమావేశంలో జైళ్ల శాఖ ఇన్‌స్పెక్టర్ జనరల్ ఎన్. మురళీ బాబు, డిప్యూటీ ఇన్‌స్పెక్టర్ జనరల్ డాక్టర్ డి. శ్రీనివాస్, అసిస్టెంట్ డైరెక్టర్ ఆఫ్ ఇండస్ట్రీస్ ఎం. ఖాలిద్ అక్తర్, చర్లపల్లి కేంద్ర కారాగారం సూపరింటెండెంట్ జి. ప్రమోద్తో పాటు జైళ్ల శాఖ, ఇతర విభాగాల అధికారులు పాల్గొన్నారు.