వార్త:
“అరైవ్ అలైవ్ క్యాంపెయిన్”లో భాగంగా రోడ్డు ప్రమాదాల సమయంలో గోల్డెన్ అవర్ ప్రాముఖ్యతపై అవగాహన కార్యక్రమం హైదరాబాద్‌లో నిర్వహించారు. ప్రజా పాలన ప్రగతి ప్రణాళిక 99 రోజుల యాక్షన్ ప్లాన్‌లో భాగంగా, జూబ్లీహిల్స్ జోన్ ట్రాఫిక్ పోలీస్ ఆధ్వర్యంలో Apollo Hospitalsలో ఈ కార్యక్రమం జరిగింది.
ఈ కార్యక్రమానికి ముఖ్య అతిథిగా హాజరైన ట్రాఫిక్ జాయింట్ కమిషనర్ డి. జోయెల్ డేవిస్ మాట్లాడుతూ, రోడ్డు ప్రమాదం జరిగిన వెంటనే మొదటి 60 నిమిషాలు “గోల్డెన్ అవర్”గా అత్యంత కీలకమని తెలిపారు. ఈ సమయంలో తక్షణ వైద్య చికిత్స అందితే ప్రాణాలను కాపాడటంతో పాటు తీవ్ర గాయాల ప్రభావాన్ని తగ్గించవచ్చని వివరించారు. గుండె ఆగిపోవడం వంటి సందర్భాల్లో మొదటి 10 నిమిషాలను “గోల్డెన్ 10 నిమిషాలు”గా పరిగణించి, సీపీఆర్ ద్వారా ప్రాణాలను రక్షించవచ్చని తెలిపారు.
ప్రమాద బాధితులకు గోల్డెన్ అవర్‌లో ప్రథమ చికిత్స అందించేందుకు ఆటో, క్యాబ్, బస్సు డ్రైవర్లు మరియు యువతకు శిక్షణ ఇవ్వడం ద్వారా మరిన్ని ప్రాణాలు కాపాడవచ్చని ఆయన పేర్కొన్నారు. అలాగే, ప్రమాద సమయంలో బాధితులకు సహాయం చేసిన వారికి ప్రభుత్వం “రాహ్-వీర్ (Good Samaritan)” పథకం కింద రూ.25,000 నగదు బహుమతి మరియు ప్రశంసా పత్రం అందజేస్తుందని తెలిపారు.
ఈ సందర్భంగా రహదారి భద్రత, ట్రాఫిక్ నిబంధనల ప్రాముఖ్యతపై కూడా అవగాహన కల్పించారు.
డిప్యూటీ కమిషనర్ ఆఫ్ పోలీస్ (ట్రాఫిక్-2) కాజల్ సింగ్ మాట్లాడుతూ, డ్రైవింగ్ సమయంలో ఎప్పుడూ అప్రమత్తంగా ఉండాలని, నిర్లక్ష్యంగా డ్రైవింగ్ చేయరాదని, మద్యం సేవించి వాహనం నడపడం పూర్తిగా మానుకోవాలని సూచించారు. డిఫెన్సివ్ డ్రైవింగ్ ద్వారా ప్రమాదాలను ముందుగానే అంచనా వేసి నివారించవచ్చని తెలిపారు.
ఈ కార్యక్రమంలో అదనపు డీసీపీ సి. వేణుగోపాల్ రెడ్డి, ఏసీపీ ట్రాఫిక్ జూబ్లీహిల్స్ జోన్ కె. హరి ప్రసాద్, జూబ్లీహిల్స్ ట్రాఫిక్ ఇన్స్పెక్టర్ రవీందర్, బేగంపేట ట్రాఫిక్ ట్రైనింగ్ ఇన్స్టిట్యూట్ ఇన్స్పెక్టర్ నాగుల అశోక్, అపోలో ఆసుపత్రి వైద్యులు డా. విశ్వేశ్వర్ రెడ్డి, డా. సౌజన్య తదితరులు పాల్గొన్నారు.
ఈ అవగాహన కార్యక్రమం ద్వారా రోడ్డు ప్రమాదాల సమయంలో వేగవంతమైన సహాయం అందించడం ద్వారా ప్రాణాలను కాపాడాలనే సందేశాన్ని పోలీసులు ప్రజలకు అందించారు.