ప్రకాశం జిల్లాలో బావిలో లభ్యమైన మృతదేహం అంకం రాహుల్‌దేనని అనుమానం – డీఎన్‌ఏ పరీక్షతో నిర్ధారణ
హైదరాబాద్, జూన్ 8: కాచిగూడ పోలీస్ స్టేషన్ పరిధిలో నమోదైన బీటెక్ విద్యార్థి అదృశ్యం కేసు విషాదాంతమైంది. జగిత్యాల జిల్లాకు చెందిన అంకం రాహుల్ అనే విద్యార్థి మృతదేహం ప్రకాశం జిల్లాలోని ఓ బావిలో లభ్యమైనట్లు పోలీసులు వెల్లడించారు. అయితే మృతదేహం రాహుల్‌దేనని నిర్ధారించేందుకు డీఎన్‌ఏ పరీక్ష నిర్వహించనున్నారు.
పోలీసుల వివరాల ప్రకారం, జగిత్యాల జిల్లాకు చెందిన అంకం రాజేశ్వర్ తన కుమారుడు అంకం రాహుల్ కనిపించడం లేదని ఫిర్యాదు చేయడంతో కాచిగూడ పోలీస్ స్టేషన్‌లో క్రైమ్ నంబర్ 287/2026 కింద మిస్సింగ్ కేసు నమోదు చేశారు. రాహుల్ సైదాబాద్‌లోని లక్ష్మికళ బాయ్స్ హాస్టల్‌లో ఉంటూ బీటెక్ విద్యను అభ్యసిస్తున్నాడు.
గత నెల 27, 2026న రాహుల్ తన స్నేహితుడి మోటార్‌సైకిల్‌పై కాచిగూడ టూరిస్ట్ జంక్షన్‌కు చేరుకున్నాడు. అక్కడ బైక్ దిగి, తాను స్నేహితులతో కలిసి బయటకు వెళ్తున్నానని చెప్పి వెళ్లిపోయాడు. అనంతరం అతని ఆచూకీ లభించకపోవడంతో కుటుంబ సభ్యులు పోలీసులను ఆశ్రయించారు.
ఈ కేసును అత్యంత ప్రాధాన్యతగా తీసుకున్న కాచిగూడ పోలీసులు అన్ని కోణాల్లో దర్యాప్తు చేపట్టి ఆధారాలు సేకరించారు. ఈ క్రమంలో జూన్ 7 రాత్రి కీలక సమాచారం లభించింది. ప్రకాశం జిల్లా సింగరాయకొండ పోలీస్ స్టేషన్ పరిధిలోని ఓ బావిలో మే 30న గుర్తుతెలియని వ్యక్తి మృతదేహం లభ్యమైనట్లు, ఆ ఘటనపై అక్కడ కేసు నమోదైందని తెలిసింది.
సింగరాయకొండ పోలీసులు మృతదేహం వద్ద స్వాధీనం చేసుకున్న వస్తువులు, ఇతర ఆధారాలను పరిశీలించగా అవి అదృశ్యమైన విద్యార్థి అంకం రాహుల్ వివరాలకు సరిపోలినట్లు గుర్తించారు. అయితే పూర్తి స్థాయి నిర్ధారణ కోసం డీఎన్‌ఏ పరీక్ష నిర్వహించనున్నారు.
ఈ విషాద సమాచారాన్ని కుటుంబ సభ్యులకు అధికారికంగా తెలియజేసినట్లు పోలీసులు తెలిపారు. కేసుకు సంబంధించిన అన్ని అంశాలపై కాచిగూడ పోలీసులు తదుపరి దర్యాప్తు కొనసాగిస్తున్నారు.
– ఎస్‌హెచ్‌ఓ, కాచిగూడ పోలీస్ స్టేషన్