హైదరాబాద్: ప్రజల ఆరోగ్యంతో చెలగాటం ఆడుతున్న కలుషిత అల్లం-వెల్లుల్లి పేస్ట్ తయారీ కేంద్రంపై పోలీసులు భారీ దాడి నిర్వహించి నిందితుడిని అరెస్ట్ చేశారు. ఈ ఘటన మైలార్‌దేవ్‌పల్లి పోలీస్ స్టేషన్ పరిధిలోని కట్టెదాన్ పారిశ్రామిక ప్రాంతంలో వెలుగులోకి వచ్చింది.

హైదరాబాద్ కమిషనర్ టాస్క్‌ఫోర్స్ (ఖైరతాబాద్ జోన్) మరియు హెచ్-ఫాస్ట్ బృందం సంయుక్తంగా నిర్వహించిన ఈ దాడిలో ‘SKR ఫుడ్ ప్రొడక్ట్స్’ అనే యూనిట్‌లో అక్రమ కార్యకలాపాలు వెలుగుచూశాయి. ఈ కేసులో హసన్ అలీ రూపానీ (55) అనే వ్యక్తిని పోలీసులు అదుపులోకి తీసుకున్నారు. నిందితుడు అబిడ్స్ ప్రాంతానికి చెందినవాడిగా గుర్తించారు.

పోలీసుల తనిఖీల్లో షాకింగ్ విషయాలు బయటపడ్డాయి. అత్యంత అపరిశుభ్రమైన పరిస్థితుల్లో ప్లాస్టిక్ డబ్బాల్లో అల్లం-వెల్లుల్లి పేస్ట్ తయారు చేస్తున్నట్లు గుర్తించారు. నాణ్యతలేని అల్లం, వెల్లుల్లి తొక్కలను ఉపయోగిస్తూ, ఎసిటిక్ యాసిడ్, గ్జాంతమ్ గమ్ వంటి రసాయనాలు కలుపుతున్నట్లు వెల్లడైంది.

ఈ కలుషిత పేస్ట్‌ను బహిరంగ ప్రదేశాల్లో ఉంచడం వల్ల దుమ్ము, ఈగలు వాలుతున్నా కూడా వాటిని ప్యాక్ చేసి హోల్‌సేల్ కిరాణా దుకాణాలు, క్యాటరింగ్ సర్వీసులకు సరఫరా చేస్తున్నట్లు పోలీసులు తెలిపారు. ఆహార భద్రతా ప్రమాణాలకు సంబంధించిన సర్టిఫికేట్లు లేకుండా కేవలం లాభాపేక్షతో ఈ వ్యాపారం కొనసాగిస్తున్నట్లు వెల్లడైంది.

పాలపిట్టలను బంధించి విక్రయిస్తే కఠిన చర్యలు.. సీపీ వీసీ సజ్జనార్ హెచ్చరిక

దాడిలో భాగంగా సుమారు రూ. 22 లక్షల విలువైన సామాగ్రిని పోలీసులు స్వాధీనం చేసుకున్నారు. వీటిలో 4,032 కిలోల తయారైన పేస్ట్, 6,000 కిలోల నాణ్యతలేని వెల్లుల్లి, 210 కిలోల అల్లం, 250 కిలోల ఉప్పు, రసాయనాలు, అలాగే 5 గ్రైండింగ్ యంత్రాలు ఉన్నాయి.

అరెస్టయిన నిందితుడిని, స్వాధీనం చేసుకున్న వస్తువులను తదుపరి చర్యల కోసం మైలార్‌దేవ్‌పల్లి పోలీస్ స్టేషన్‌కు అప్పగించారు. ఈ ఆపరేషన్‌లో టాస్క్‌ఫోర్స్ అధికారులు మరియు స్థానిక పోలీసులు పాల్గొన్నారు.

పోలీసులు ప్రజలకు విజ్ఞప్తి చేస్తూ, ఆహార పదార్థాలను కొనుగోలు చేసే సమయంలో నాణ్యత, లైసెన్సులు తప్పనిసరిగా పరిశీలించాలని సూచించారు.