తంగలపల్లి మండలం: ప్రధాన రహదారిపై తెగి పడిన కరెంట్ వైర్లను గుర్తించి అప్రమత్తంగా వ్యవహరించిన హోమ్ గార్డ్ డ్రైవర్ తేజ పెద్ద ప్రమాదాన్ని తప్పించారు.
సోమవారం అర్ధరాత్రి సుమారు రెండు గంటల సమయంలో, సిరిసిల్ల డిఎస్పీ పెట్రోలింగ్ నిర్వహిస్తున్న వేళ గాలి ప్రభావంతో తడూర్ చౌరస్తా వద్ద రోడ్డుకు అడ్డంగా విద్యుత్ వైర్లు తెగి పడిపోయాయి. అదే సమయంలో పెట్రోలింగ్ వాహనాన్ని నడుపుతున్న తేజ పరిస్థితిని గమనించి వెంటనే అప్రమత్తమయ్యారు.
వెంటనే వాహనాన్ని ఆపి ప్రమాదాన్ని అంచనా వేసిన తేజ, డిఎస్పీకి సమాచారం అందించారు. అనంతరం సంబంధిత విద్యుత్ శాఖ అధికారులకు సమాచారం ఇవ్వడంతో వెంటనే స్పందించి వైర్లను సరిచేశారు. దీంతో ఎలాంటి ప్రమాదం జరగకుండా నివారించగలిగారు.
ముందుగానే ప్రమాదాన్ని గుర్తించి చాకచక్యంగా వ్యవహరించిన తేజను పోలీస్ అధికారులు అభినందించారు. డ్రైవర్ అనేది కేవలం వాహనం నడిపేవారే కాకుండా, అప్రమత్తతతో ప్రజల ప్రాణాలను కాపాడగల బాధ్యతగల వ్యక్తి అని తేజ తన చర్యలతో నిరూపించారు.