హైదరాబాద్ సిటీ పోలీస్ పరిధిలో వివిధ కేసులు, ప్రమాదాలు మరియు ఇతర కారణాలతో స్వాధీనం చేసుకుని, యజమానులు క్లెయిమ్ చేయకుండా పోలీస్ గ్రౌండ్స్లో నిల్వ ఉంచిన 1130 వాహనాలను బహిరంగ వేలం వేయాలని హైదరాబాద్ సిటీ పోలీసులు నిర్ణయించారు. హైదరాబాద్ (మెట్రోపాలిటన్ ఏరియా) పోలీస్ యాక్ట్-2004లోని సెక్షన్ 7 మరియు హైదరాబాద్ సిటీ పోలీస్ యాక్ట్లోని సెక్షన్ 40 ప్రకారం ఈ చర్యలు చేపడుతున్నట్లు అధికారులు తెలిపారు.
ఈ వాహనాలపై ఎవరికైనా యాజమాన్య హక్కులు, హైపోథికేషన్ ఆసక్తి లేదా ఇతర అభ్యంతరాలు ఉంటే, ప్రకటన వెలువడిన తేదీ నుంచి ఆరు నెలల లోపు తగిన ఆధారాలతో బంజారాహిల్స్లోని ICCC భవనంలో ఉన్న హైదరాబాద్ సిటీ పోలీస్ కమిషనర్ను సంప్రదించి తమ వాహనాలను క్లెయిమ్ చేసుకోవాలని సూచించారు.
నిర్దిష్ట గడువులోగా ఎటువంటి దరఖాస్తులు అందని పక్షంలో, ఆయా వాహనాలను ప్రభుత్వ నిబంధనల ప్రకారం బహిరంగ వేలం ద్వారా విక్రయించనున్నట్లు వెల్లడించారు.
వేలం వేయనున్న వాహనాల పూర్తి వివరాలు అంబర్పేటలోని పోలీస్ హాస్పిటల్ వెనుక ఉన్న SAR CPL పోలీస్ గ్రౌండ్స్లోని వేలం బృందం వద్ద అందుబాటులో ఉంటాయని తెలిపారు. అలాగే వాహనాల జాబితా, ఇతర వివరాల కోసం హైదరాబాద్ సిటీ పోలీస్ అధికారిక వెబ్సైట్ను సందర్శించవచ్చని అధికారులు పేర్కొన్నారు.