దసరా వేళ మూగజీవాల స్వేచ్ఛను హరించవద్దు.. బంధించిన పక్షుల ప్రదర్శనలను ప్రోత్సహించకండి
హైదరాబాద్‌: పండుగ అంటే ఆనందం, స్వేచ్ఛ, తోటి ప్రాణుల పట్ల కరుణ చూపించడమని హైదరాబాద్‌ నగర పోలీస్ కమిషనర్‌ వీసీ సజ్జనార్, ఐపీఎస్‌ పేర్కొన్నారు. దసరా పండుగ సందర్భంగా తెలంగాణ రాష్ట్ర పక్షి పాలపిట్టలను బంధించి, వాటి రెక్కలు కత్తిరించి, ఆహారం, నీరు లేకుండా హింసిస్తూ వ్యాపారం చేయడం అమానవీయమని ఆయన ఆవేదన వ్యక్తం చేశారు.
మూగజీవాల స్వేచ్ఛను హరించి, వాటిని హింసించడం వల్ల ఎవరికీ మేలు జరగదని సజ్జనార్ పేర్కొన్నారు. పక్షుల వేదనలో శుభాన్ని వెతకడం సరికాదని, పండుగల సమయంలోనూ జీవుల పట్ల కరుణ, మానవత్వం చూపించాలని సూచించారు.
పాలపిట్ట పర్యావరణ పరిరక్షణలో కీలక పాత్ర పోషిస్తుందని, రైతులకు మేలు చేసే పక్షి అని తెలిపారు. నీలాకాశంలో స్వేచ్ఛగా ఎగురుతున్నప్పుడే ప్రకృతికి అందం చేకూరుతుందని పేర్కొన్నారు. దసరా సందర్భంగా పాలపిట్టలను బంధించి ప్రదర్శించడం, విక్రయించడం వంటి చర్యలను ఎట్టి పరిస్థితుల్లోనూ ప్రోత్సహించవద్దని ప్రజలకు విజ్ఞప్తి చేశారు.
బంధించడం, విక్రయించడం చట్టరీత్యా నేరం
వన్యప్రాణి సంరక్షణ చట్టం–1972 ప్రకారం పాలపిట్టలను బంధించడం, విక్రయించడం, ప్రదర్శించడం చట్టరీత్యా నేరమని సజ్జనార్ గుర్తుచేశారు. వన్యప్రాణుల పట్ల క్రూరత్వానికి పాల్పడే చర్యలను అరికట్టేందుకు ప్రజలు బాధ్యతాయుతంగా వ్యవహరించాలని కోరారు.
ఎక్కడైనా పాలపిట్టలను బంధించినట్లు, విక్రయిస్తున్నట్లు గుర్తిస్తే వెంటనే 18004255364, 9803338666 టోల్‌ఫ్రీ నంబర్లకు లేదా డయల్‌ 112కు సమాచారం అందించాలని సూచించారు.
ఈ దసరా పండుగ వేళ మూగజీవాలకు స్వేచ్ఛను ప్రసాదిస్తూ, ప్రకృతి పరిరక్షణలో ప్రతి ఒక్కరూ భాగస్వాములు కావాలని సీపీ వీసీ సజ్జనార్ పిలుపునిచ్చారు.