హైదరాబాద్ నగరంలో డ్రగ్స్ నిర్మూలనపై ప్రత్యేక దృష్టి సారించిన హైదరాబాద్ సిటీ పోలీసులు మరో కీలక చర్య చేపట్టారు. హైదరాబాద్ సిటీ పోలీస్ కమిషనర్ శ్రీ వి.సి. సజ్జనార్ ఆదేశాల మేరకు 06-05-2026న హైదరాబాద్ నార్కోటిక్స్ ఎన్ఫోర్స్మెంట్ వింగ్ (H-NEW), టాస్క్ ఫోర్స్ బృందాలు మరియు స్థానిక పోలీస్ సిబ్బంది కలిసి ప్రత్యేక డ్రైవ్ నిర్వహించారు.
ఈ డ్రైవ్లో భాగంగా రౌడీ షీటర్లు, అల్లరి మూకలు మరియు ఎన్డీపీఎస్ కేసుల్లో డ్రగ్స్ సేవించిన చరిత్ర ఉన్న వ్యక్తులకు ఆకస్మిక వైద్య పరీక్షలు నిర్వహించారు. డ్రగ్స్ వినియోగం వల్ల కలిగే చట్టపరమైన పరిణామాలపై అవగాహన కల్పించడం ఈ కార్యక్రమం ప్రధాన ఉద్దేశ్యంగా పోలీసులు తెలిపారు.
ఈ కార్యక్రమం టాస్క్ ఫోర్స్/హెచ్-న్యూ డీసీపీ వైభవ్ రఘునాథ్ గైక్వాడ్ పర్యవేక్షణలో, టాస్క్ ఫోర్స్ చార్మినార్ జోన్ అడిషనల్ డీసీపీ అందె శ్రీనివాస్ సమన్వయంతో జరిగింది. ఉస్మానియా జనరల్ హాస్పిటల్, గాంధీ హాస్పిటల్ మరియు ఎర్రగడ్డ ప్రభుత్వ మానసిక ఆరోగ్య ఆసుపత్రి వైద్యుల సహకారంతో పరీక్షలు నిర్వహించారు.
గాంధీ జనరల్ హాస్పిటల్లో 41 మందికి పరీక్షలు నిర్వహించగా 12 మందికి పాజిటివ్, 29 మందికి నెగటివ్గా తేలింది. ఉస్మానియా జనరల్ హాస్పిటల్లో 90 మందికి పరీక్షలు నిర్వహించగా 52 మందికి పాజిటివ్, 38 మందికి నెగటివ్గా నిర్ధారణ అయింది. ఎర్రగడ్డ మానసిక ఆరోగ్య ఆసుపత్రిలో 73 మందికి పరీక్షలు నిర్వహించగా 23 మందికి పాజిటివ్, 50 మందికి నెగటివ్గా తేలింది.
మొత్తంగా 204 మందికి పరీక్షలు నిర్వహించగా 87 మంది డ్రగ్స్ సేవించినట్లు నిర్ధారణ అయినట్లు అధికారులు వెల్లడించారు.
డ్రగ్స్ సేవించినట్లు తేలిన వ్యక్తులకు సైకియాట్రిస్ట్ వైద్యుల ద్వారా డ్రగ్స్ వల్ల కలిగే దుష్ప్రభావాలు, పునరావాసం అవసరంపై కౌన్సెలింగ్ అందించారు. అలాగే పాజిటివ్గా తేలిన వారిపై చట్టప్రకారం కేసులు నమోదు చేస్తున్నట్లు పోలీసులు తెలిపారు.
డ్రగ్స్కు వ్యతిరేకంగా కఠిన చర్యలు కొనసాగుతాయని, అదే సమయంలో బాధితుల పునరావాసానికి కూడా సహకరిస్తామని హైదరాబాద్ సిటీ టాస్క్ ఫోర్స్ మరియు హెచ్-న్యూ విభాగాలు స్పష్టం చేశాయి. ఆరోగ్యవంతమైన, సురక్షితమైన సమాజం కోసం డ్రగ్స్కు దూరంగా ఉండాలని ప్రజలకు విజ్ఞప్తి చేశాయి.