దేశవ్యాప్తంగా పోలీసు విభాగంలో ప్రతిభను వెలికితీసే ప్రతిష్టాత్మక పోటీలైన ఆల్ ఇండియా పోలీసు డ్యూటీ మీట్ – 2025 ఈసారి మహారాష్ట్ర రాష్ట్రంలోని నాగపూర్ నగరంలో ఘనంగా నిర్వహిస్తున్నారు. దేశంలోని వివిధ రాష్ట్రాలకు చెందిన ఉత్తమ పోలీసు సిబ్బంది ఈ పోటీల్లో తమ ప్రతిభను ప్రదర్శిస్తున్నారు.
ఈ జాతీయ స్థాయి పోటీలకు తెలంగాణ రాష్ట్ర పోలీసు తరఫున ఎంపికైన జట్టులో జీడిమెట్ల పోలీసు స్టేషన్కు చెందిన ఎస్ఐ ఆర్. ప్రేమ్ సాగర్ చోటు దక్కించుకోవడం గర్వకారణంగా నిలిచింది.
పోలీసు డ్యూటీ మీట్ అనేది పోలీసు సిబ్బంది పరిశోధన నైపుణ్యం, నేర విచారణ పద్ధతులు, శాస్త్రీయ సాక్ష్యాల సేకరణ, శారీరక సామర్థ్యం వంటి అంశాల్లో వారి ప్రతిభను పరీక్షించే కీలక వేదికగా నిలుస్తుంది.
గతంలో నిర్వహించిన రాష్ట్ర స్థాయి పోలీసు డ్యూటీ మీట్ పోటీల్లో ప్రేమ్ సాగర్ విశేష ప్రతిభ కనబరిచి 2 బంగారు పతకాలు, 1 వెండి పతకం, 1 కాంస్య పతకం సాధించడం ఆయన ప్రతిభకు నిదర్శనం.
ఆయన కృషి, క్రమశిక్షణ, విధి పట్ల ఉన్న నిబద్ధత కారణంగానే ఈ స్థాయికి చేరుకున్నారని సహచరులు అభిప్రాయపడుతున్నారు.
ప్రస్తుతం నాగపూర్లో నిర్వహిస్తున్న జాతీయ స్థాయి పోటీలలో పాల్గొంటున్న ఆయన అత్యుత్తమ ప్రదర్శన కనబరిచి తెలంగాణ రాష్ట్రానికి మరింత కీర్తి తీసుకురావాలని జీడిమెట్ల పోలీస్ స్టేషన్ సిబ్బంది ఆశాభావం వ్యక్తం చేస్తున్నారు. ఆయన విజయాన్ని ఆకాంక్షిస్తూ సిబ్బంది హృదయపూర్వక శుభాకాంక్షలు తెలిపారు.