టోలిచౌకి పోలీస్ స్టేషన్ పరిధిలో భారీ కార్డన్ అండ్ సెర్చ్ ఆపరేషన్; 23 మంది విదేశీయుల అదుపు, అక్రమ వస్తువుల స్వాధీనం.
ఫిబ్రవరి 16, 2026 రాత్రి టోలిచౌకి పోలీస్ స్టేషన్ పరిధిలోని పారామౌంట్ కాలనీ (గేట్ నం. 1 నుండి 4), IAS కాలనీ మరియు హకీంపేట కుంట ప్రాంతాలలో భారీ కార్డన్ అండ్ సెర్చ్ ఆపరేషన్ నిర్వహించడమైనది.
గోల్కొండ జోన్ డిసిపి జి. చంద్రమోహన్ ప్రత్యక్ష పర్యవేక్షణలో, సుమారు 250 మంది పోలీసు సిబ్బందితో ఈ తనిఖీలు చేపట్టారు. ఈ ఆపరేషన్లో 10 సెర్చ్ పార్టీలు, 7 కట్ ఆఫ్ పార్టీలు, 5 లిఫ్టింగ్ పార్టీలు మరియు 2 హోల్డింగ్ పాయింట్లు పాల్గొన్నాయి.
FRRO హైదరాబాద్ సహాయంతో నిర్వహించిన ఈ తనిఖీల్లో, వీసా గడువు ముగిసినా అక్రమంగా నివసిస్తున్న వివిధ దేశాలకు చెందిన 23 మంది విదేశీయులను గుర్తించి అదుపులోకి తీసుకోవడం జరిగింది.
సరైన పత్రాలు లేని 30 ద్విచక్ర వాహనాలు, అక్రమంగా గ్యాస్ రీఫిల్లింగ్ చేస్తున్న 9 గ్యాస్ సిలిండర్లు (3 పెద్దవి, 6 చిన్నవి), నిబంధనలకు విరుద్ధంగా నిల్వ ఉంచిన 53 మద్యం సీసాలు (180ml మరియు 90ml) • స్వాధీనం చేసుకున్నారు.
నగర శాంతిభద్రతల పరిరక్షణలో భాగంగా ఇటువంటి తనిఖీలు కొనసాగుతాయని, చట్టవిరుద్ధ కార్యకలాపాలకు పాల్పడే వారిపై కఠిన చర్యలు తీసుకుంటామని ఈ సందర్భంగా తెలియజేయడమైనది.