ఆగస్టు 18 నుంచి అమలు • ట్రాఫిక్ నిర్వహణకు రెండు పైలట్ ట్రయల్స్ పూర్తి చేసిన హైదరాబాద్ ట్రాఫిక్ పోలీసులు
హైదరాబాద్, ఆగస్టు 11, 2026: కేబీఆర్ పార్క్ పరిసర కారిడార్లో ‘హెచ్-సిటీ’ (H-CITI) ప్రాజెక్ట్ కింద ఫ్లైఓవర్లు, అండర్పాస్ల నిర్మాణ పనులు కొనసాగుతున్న నేపథ్యంలో, ఆగస్టు 18, 2026 నుంచి కేబీఆర్ పార్క్ చుట్టూ వన్వే ట్రాఫిక్ విధానాన్ని హైదరాబాద్ ట్రాఫిక్ పోలీసులు అమలు చేయనున్నారు.
ప్రస్తుతం కొనసాగుతున్న నిర్మాణ పనుల కారణంగా రహదారి అందుబాటులో ఉన్న విస్తీర్ణం తగ్గిపోయింది. పరిమిత రహదారి స్థలంలోనే వాహనాల రాకపోకలు కొనసాగుతున్నందున, ఇరువైపులా వాహనాల రాకపోకలను అనుమతిస్తే తీవ్రమైన ట్రాఫిక్ రద్దీ, ప్రయాణంలో జాప్యం, వాహనాల మధ్య ప్రమాదకరమైన కాన్ఫ్లిక్ట్ పాయింట్లు ఏర్పడే అవకాశం ఉంది.
ఈ నేపథ్యంలో ట్రాఫిక్ రద్దీని తగ్గించడం, వాహనాల రాకపోకలను క్రమబద్ధీకరించడం, ప్రయాణికుల సురక్షిత ప్రయాణాన్ని నిర్ధారించడం లక్ష్యంగా వన్వే ట్రాఫిక్ విధానాన్ని అమలు చేయాలని హైదరాబాద్ ట్రాఫిక్ పోలీసులు నిర్ణయించారు.
రెండు పైలట్ ట్రయల్స్ నిర్వహణ
వన్వే విధానాన్ని అమలు చేయడానికి ముందు దాని సాధ్యాసాధ్యాలు, నిర్వహణ అవసరాలను అంచనా వేసేందుకు హైదరాబాద్ ట్రాఫిక్ పోలీసులు రెండు పైలట్ ట్రయల్స్ నిర్వహించారు.
- మొదటి ట్రయల్: ఏప్రిల్ 5, 2026 – సుమారు 3 గంటల పాటు.
- రెండవ ట్రయల్: జూన్ 21, 2026 – సుమారు 6 గంటల పాటు.
ఈ రెండు ట్రయల్స్ సందర్భంగా ట్రాఫిక్ ప్రవాహం, జంక్షన్ల పనితీరు, లేన్ క్రమశిక్షణ, రద్దీ ప్రాంతాలు, వాహనాల రాకపోకలను క్షుణ్ణంగా పరిశీలించారు. ఈ పరిశీలనల ఆధారంగా అవసరమైన మార్పులు, సర్దుబాట్లు చేసిన అనంతరం ఆగస్టు 18 నుంచి వన్వే ట్రాఫిక్ విధానాన్ని అధికారికంగా అమలు చేయనున్నారు.
సజావుగా అమలుకు ప్రత్యేక ఏర్పాట్లు
ప్రయాణికులకు ఇబ్బందులు కలగకుండా హైదరాబాద్ ట్రాఫిక్ పోలీసులు పలు ఏర్పాట్లు చేశారు.
- అవసరమైన ప్రాంతాల్లో సరైన లేన్ మార్కింగ్లు, లేన్ ఛేంజర్లు ఏర్పాటు.
- కీలక కూడళ్ల వద్ద దిశానిర్దేశక బోర్డులు, ట్రాఫిక్ సైన్ బోర్డులు ఏర్పాటు.
- వాహనదారులకు మార్గనిర్దేశం, సహాయం అందించేందుకు ముఖ్య ప్రాంతాల్లో 24×7 ట్రాఫిక్ పోలీసుల నియామకం.
- ప్రయాణికులు తమ ప్రయాణాలను సులభంగా ప్లాన్ చేసుకునేందుకు గూగుల్ మ్యాప్స్, నావిగేషన్ రూట్లలో అవసరమైన మార్పులు చేయడం.
- ఇంటిగ్రేటెడ్ కమాండ్ అండ్ కంట్రోల్ సెంటర్, సీసీటీవీ నెట్వర్క్ ద్వారా నిరంతర పర్యవేక్షణ.
- ట్రాఫిక్ ప్రవాహం, రద్దీని అంచనా వేసేందుకు అనువైన ప్రాంతాల్లో డ్రోన్ల ద్వారా రియల్టైమ్ పర్యవేక్షణ.
- ప్రారంభ అమలు దశలో ట్రాఫిక్ పరిస్థితులను నిరంతరం సమీక్షిస్తూ, అవసరమైన క్షేత్రస్థాయి సర్దుబాట్లు చేయడం.
ప్రయాణికులు, సందర్శకులు, వాకర్లు పాటించాల్సినవి
చేయాల్సినవి
ముందస్తు ప్రణాళిక: కొత్త వన్వే ట్రాఫిక్ విధానాన్ని దృష్టిలో ఉంచుకుని ప్రయాణాలను ముందుగానే ప్లాన్ చేసుకోవాలి.
ట్రాఫిక్ సూచనలు పాటించాలి: లేన్ మార్కింగ్లు, దిశా సూచికలు, సైన్ బోర్డులు, విధుల్లో ఉన్న ట్రాఫిక్ పోలీసుల సూచనలను తప్పనిసరిగా పాటించాలి.
అత్యవసర వాహనాలకు దారి ఇవ్వాలి: ట్రాఫిక్ సిబ్బంది సూచనల మేరకు అంబులెన్సులు, ఫైర్ ఇంజిన్లు వంటి అత్యవసర వాహనాలకు లేన్-2 ద్వారా ఆటంకం లేని మార్గాన్ని కల్పించాలి.
అధికారిక సమాచారాన్ని మాత్రమే అనుసరించాలి: తాజా ట్రాఫిక్ అప్డేట్ల కోసం హైదరాబాద్ ట్రాఫిక్ పోలీసుల అధికారిక సోషల్ మీడియా ఖాతాలు, నావిగేషన్ యాప్లను మాత్రమే అనుసరించాలి.
బాధ్యతాయుతంగా పార్కింగ్ చేయాలి: కేబీఆర్ పార్క్ వాకర్లు, సందర్శకులు తమ వాహనాలను కేటాయించిన పార్కింగ్ ప్రాంతాల్లో మాత్రమే నిలపాలి. ముఖ్యంగా ఉదయం, సాయంత్రం రద్దీ సమయాల్లో సవరించిన ట్రాఫిక్ నిబంధనలను పాటించాలి.
చేయకూడనివి
రాంగ్సైడ్ డ్రైవింగ్ చేయకూడదు: రాత్రి వేళల్లో లేదా రద్దీ తక్కువగా ఉండే సమయాల్లో కూడా ఎట్టి పరిస్థితుల్లోనూ రాంగ్సైడ్లో వాహనాలు నడపరాదు. నిర్దేశిత ట్రాఫిక్ ప్రవాహానికి వ్యతిరేకంగా వాహనాలు నడపడం వల్ల ఎదురెదురుగా ఢీకొనే ప్రమాదాలు, ప్రాణనష్టం సంభవించే అవకాశం ఉంది.
అనధికారికంగా లేదా ట్రాఫిక్కు ఆటంకం కలిగేలా పార్కింగ్ చేయకూడదు: రోడ్డుకు తప్పుడు వైపున, మలుపుల వద్ద లేదా ట్రాఫిక్కు, అత్యవసర వాహనాల రాకపోకలకు ఆటంకం కలిగే విధంగా వాహనాలను నిలపరాదు.
ధ్రువీకరించని సమాచారాన్ని నమ్మకూడదు: అనధికారిక సోషల్ మీడియా గ్రూపుల్లో ప్రచారమయ్యే ధ్రువీకరించని ట్రాఫిక్ సమాచారాన్ని నమ్మకూడదు, ఫార్వర్డ్ చేయకూడదు. హైదరాబాద్ ట్రాఫిక్ పోలీసులు విడుదల చేసే అధికారిక సమాచారాన్ని మాత్రమే విశ్వసించాలి.
ప్రజలకు హైదరాబాద్ ట్రాఫిక్ పోలీసుల విజ్ఞప్తి
హెచ్-సిటీ నిర్మాణ పనుల కారణంగా రహదారి విస్తీర్ణం తగ్గిన నేపథ్యంలో కేబీఆర్ పార్క్ చుట్టూ సురక్షితమైన, సాఫీగా సాగే ట్రాఫిక్ను కొనసాగించడమే లక్ష్యంగా వన్వే విధానాన్ని ట్రాఫిక్ నిర్వహణ చర్యగా అమలు చేస్తున్నట్లు హైదరాబాద్ ట్రాఫిక్ పోలీసులు తెలిపారు.
కొత్త ట్రాఫిక్ విధానం విజయవంతంగా అమలు కావాలంటే పౌరుల సహకారం ఎంతో అవసరమని పేర్కొన్నారు. నిర్దేశిత ట్రాఫిక్ దిశ, లేన్ క్రమశిక్షణ, సైన్ బోర్డులు, క్షేత్రస్థాయి ట్రాఫిక్ సిబ్బంది సూచనలను ప్రతి ఒక్కరూ తప్పనిసరిగా పాటించాలని కోరారు.
సీసీటీవీ నిఘా, డ్రోన్ సమాచారం, క్షేత్రస్థాయి సిబ్బంది ద్వారా 24×7 ట్రాఫిక్ పరిస్థితిని నిరంతరం పర్యవేక్షించనున్నట్లు పోలీసులు తెలిపారు. పరిస్థితులకు అనుగుణంగా అవసరమైన కార్యాచరణ మార్పులను ఎప్పటికప్పుడు చేపట్టనున్నట్లు వెల్లడించారు.
జారీ చేసిన వారు: హైదరాబాద్ ట్రాఫిక్ పోలీస్