పోలీసింగ్ వ్యవస్థలో అత్యాధునిక సాంకేతికతను జోడిస్తూ హైదరాబాద్ సిటీ పోలీస్ మరో చారిత్రాత్మక ముందడుగు వేసింది. దేశంలోనే తొలిసారిగా కృత్రిమ మేధ ఆధారిత బహుభాషా ఫిర్యాదుల నమోదు యాప్ ‘ఏఐ కాప్రైటర్’ను అందుబాటులోకి తీసుకువచ్చింది. ఈ వినూత్న యాప్ను హైదరాబాద్ సీపీ వీసీ సజ్జనర్ బంజారాహిల్స్లోని టీజీఐసీసీసీలో ఆవిష్కరించి, దాని పనితీరును పరిశీలించారు.
నగరంలోని 80కి పైగా పోలీస్ స్టేషన్లలో అందుబాటులోకి రానున్న ఈ యాప్ ద్వారా బాధితులు తమ మాతృభాషలో చెప్పే ఫిర్యాదులను పోలీసులు తక్షణమే రికార్డు చేసి, అనువదించుకోగలుగుతారు. హైదరాబాద్ వంటి మెట్రో నగరంలో తెలుగు, ఇంగ్లీష్ తెలియని వలస కార్మికులు, ఇతర రాష్ట్రాల ప్రజలు, పర్యాటకులు ఎదుర్కొంటున్న భాషా సమస్యలకు ఈ యాప్ చెక్ పెట్టనుంది.
ఈ యాప్ 10కి పైగా భారతీయ భాషలను గుర్తించే సామర్థ్యాన్ని కలిగి ఉంది. హిందీ, తమిళం, బెంగాలీ, మరాఠీ వంటి భాషల్లో మాట్లాడిన ఫిర్యాదులను వెంటనే రాతపూర్వక రూపంలోకి మార్చి, పోలీసులకు అర్థమయ్యే భాషలోకి అనువదిస్తుంది. గంటల సమయం పట్టే ఫిర్యాదు నమోదు ప్రక్రియను కేవలం సెకన్లలో పూర్తి చేసేలా రూపొందించారు.
ఫిర్యాదు నమోదు చేసిన అధికారి వివరాలు, సమయం వంటి సమాచారం ఆటోమేటిక్గా పీడీఎఫ్ రూపంలో భద్రపరచబడటంతో పారదర్శకత పెరుగుతుందని అధికారులు తెలిపారు. బాధితుడు, నిందితుడు, సాక్షులు మాట్లాడే విషయాలను వేర్వేరుగా గుర్తించి రికార్డ్ చేసే మల్టీ-పార్టీ లేబులింగ్ ఫీచర్ కూడా ఈ యాప్లో ఉంది.
ఈ యాప్ను బ్లూక్లౌడ్ సాఫ్టెక్ సొల్యూషన్స్ సంస్థతో పాటు ఇంటర్న్ పాగ్రో చందు సహకారంతో హైదరాబాద్ సిటీ పోలీస్ అభివృద్ధి చేసింది.
“హైదరాబాద్ ఒక గ్లోబల్ సిటీ. ఇక్కడ వివిధ రాష్ట్రాలు, దేశాలకు చెందిన ప్రజలు నివసిస్తున్నారు. భాష తెలియక ఫిర్యాదు చేయడంలో ఎదురయ్యే సమస్యలకు ఈ యాప్ పూర్తి పరిష్కారం చూపనుంది. బాధితుడు తన మాతృభాషలో మాట్లాడితే, అది వెంటనే అధికారిక రికార్డుగా మారుతుంది. దీని వల్ల దర్యాప్తు నాణ్యత పెరగడమే కాకుండా, పోలీసు సేవలపై ప్రజల్లో మరింత నమ్మకం పెరుగుతుంది” అని సీపీ వీసీ సజ్జనర్ తెలిపారు.
ఆధునిక పోలీసింగ్లో భాగంగా హైదరాబాద్ సిటీ పోలీస్ ఇప్పటికే సైబర్ క్రైమ్ ఫిర్యాదుల కోసం ‘సి-మిత్ర’, సోషల్ మీడియా పర్యవేక్షణ కోసం ‘సాక్-ఐ’ వంటి ఏఐ ఆధారిత వ్యవస్థలను వినియోగిస్తున్నట్లు అధికారులు పేర్కొన్నారు. తాజా ‘ఏఐ కాప్రైటర్’ యాప్తో ఫిర్యాదుల నమోదు ప్రక్రియ మరింత వేగవంతం కానుందని తెలిపారు.