పదవీ విరమణ పొందిన హోంగార్డ్ శంకర్ రెడ్డికి ఘన సత్కారం.. వీడ్కోలు పలికిన అదనపు ఎస్పీ చైతన్య రెడ్డి, ఐపీఎస్
సంగారెడ్డి జిల్లా సురక్ష ప్రతినిధి: ఉద్యోగ జీవితంలో పదవీ విరమణ అనేది సహజమైన ప్రక్రియ అని, ఉద్యోగ కాలంలో అందించిన సేవలు ఎల్లప్పుడూ గుర్తుండిపోతాయని అదనపు ఎస్పీ చైతన్య రెడ్డి, ఐపీఎస్ అన్నారు. సంగారెడ్డి జిల్లా పోలీస్ కార్యాలయంలో పదవీ విరమణ పొందుతున్న హోంగార్డ్ శంకర్ రెడ్డిని ఘనంగా సత్కరించి వీడ్కోలు పలికారు.
2026 సెప్టెంబర్ 24 నాటికి 60 సంవత్సరాలు పూర్తి చేసుకుని పదవీ విరమణ పొందుతున్న శంకర్ రెడ్డిని అదనపు ఎస్పీ శాలువాతో సత్కరించి, పుష్పగుచ్ఛం అందజేసి అభినందించారు.
ఈ సందర్భంగా అదనపు ఎస్పీ మాట్లాడుతూ.. శంకర్ రెడ్డి గత 23 సంవత్సరాలుగా ఉమ్మడి మెదక్ జిల్లాలోని వివిధ పోలీస్ స్టేషన్లలో విధులు నిర్వహిస్తూ పోలీస్ శాఖకు ఉత్తమ సేవలు అందించారని కొనియాడారు. విధి నిర్వహణలో ఆయన అందించిన సేవలు పోలీస్ శాఖకు గుర్తుండిపోతాయని అన్నారు.
పదవీ విరమణ అనంతరం కూడా శంకర్ రెడ్డి, ఆయన కుటుంబ సభ్యులకు పోలీస్ శాఖ తరఫున అవసరమైన సహాయ సహకారాలు అందిస్తామని అదనపు ఎస్పీ తెలిపారు. పదవీ విరమణ అనంతరం కుటుంబ సభ్యులతో కలిసి సుఖసంతోషాలతో, ఆరోగ్యంగా జీవించాలని ఆకాంక్షించారు.
ఈ కార్యక్రమంలో ఆర్ఐలు డానియెల్, సురేష్ నాయక్, రాజశేఖర్ రెడ్డి, శ్రీనివాస్ రావు, హోంగార్డ్ సిబ్బంది తదితరులు పాల్గొన్నారు.