మహబూబాబాద్: జిల్లా పోలీసు కార్యాలయంలో అన్‌క్లెయిమ్డ్ (Unclaimed), అన్‌నోన్ (Unknown) ప్రాపర్టీ కింద భద్రపరిచిన వాహనాలను సంబంధిత యజమానులు తమ గుర్తింపు పత్రాలు, వాహన ధ్రువపత్రాలు సమర్పించి స్వాధీనం చేసుకోవాలని రిజర్వ్ ఇన్స్పెక్టర్ సోములు సూచించారు.
జిల్లా ఎస్పీ డా. షబరీష్ పి. ఆదేశాల మేరకు, ఏఆర్ డీఎస్పీ శ్రీనివాస్ పర్యవేక్షణలో ఈ ప్రక్రియ చేపట్టినట్లు తెలిపారు.
జిల్లా పోలీసు హెడ్‌క్వార్టర్స్‌లో ప్రస్తుతం అన్‌క్లెయిమ్డ్/అన్‌నోన్ ప్రాపర్టీ కింద మొత్తం 132 వాహనాలు భద్రపరిచి ఉన్నట్లు వెల్లడించారు. వాటిలో 108 మోటార్ సైకిళ్లు, 21 త్రీ వీలర్లు, 3 ఎంఎంవీలు (MMVs) ఉన్నాయని పేర్కొన్నారు.
ఈ ప్రకటన విడుదలైన తేదీ నుంచి 10 రోజులలోపు సంబంధిత యజమానులు తమ గుర్తింపు ఆధారాలు, వాహనాలకు సంబంధించిన ధ్రువపత్రాలు సమర్పించి వాహనాలను తీసుకెళ్లాలని సూచించారు. నిర్దేశిత గడువులోపు ఎవరూ క్లెయిమ్ చేయని వాహనాలను అన్‌క్లెయిమ్డ్ ప్రాపర్టీగా పరిగణించి జిల్లా నోడల్ కమిటీ ద్వారా వేలం వేయనున్నట్లు తెలిపారు.
అందువల్ల వాహన యజమానులు ఈ అవకాశాన్ని వినియోగించుకుని తమ వాహనాలను స్వాధీనం చేసుకోవాలని రిజర్వ్ ఇన్స్పెక్టర్ సోములు విజ్ఞప్తి చేశారు.