ఎండల తీవ్రత రోజురోజుకు పెరుగుతున్న నేపథ్యంలో విధుల్లో ఉన్న ట్రాఫిక్ పోలీస్ సిబ్బంది ఆరోగ్యాన్ని దృష్టిలో ఉంచుకుని జిల్లా ఎస్పీ శరత్ చంద్ర పవార్ ట్రాఫిక్ పోలీసులకు వాటర్ బాటిల్స్, క్యాప్స్ (హ్యాట్స్), గ్లూకోజ్ పౌడర్ పంపిణీ చేశారు.
ఈ సందర్భంగా ఎస్పీ మాట్లాడుతూ, మండే ఎండల్లో గంటల తరబడి విధులు నిర్వహిస్తున్న ట్రాఫిక్ సిబ్బంది ఆరోగ్య పరిరక్షణకు అవసరమైన అన్ని చర్యలు తీసుకుంటున్నామని తెలిపారు. విధుల్లో ఉన్న సమయంలో తగినంత నీరు తీసుకోవడంతో పాటు ఆరోగ్యంపై ప్రత్యేక శ్రద్ధ పెట్టాలని సూచించారు.
ట్రాఫిక్ నియంత్రణలో భాగంగా ప్రజలకు సేవలందిస్తున్న సిబ్బంది ఎండ ప్రభావానికి గురికాకుండా ఉండేందుకు ఈ సామగ్రి అందజేసినట్లు తెలిపారు. సిబ్బంది అప్రమత్తంగా విధులు నిర్వహిస్తూ ప్రజలకు మెరుగైన సేవలు అందించాలని సూచించారు.
ఈ కార్యక్రమంలో ట్రాఫిక్ విభాగం అధికారులు, పోలీస్ సిబ్బంది పాల్గొన్నారు.
