సంగారెడ్డి: సంగారెడ్డి చౌరస్తా నుంచి మదీనగూడ వరకు జాతీయ రహదారి–65పై కొనసాగుతున్న రోడ్డు విస్తరణ పనులను జిల్లా కలెక్టర్ ప్రతీక్ జైన్, ఐఏఎస్, జిల్లా ఎస్పీ పరితోష్ పంకజ్, ఐపీఎస్ పరిశీలించారు. రోడ్డు విస్తరణ పనుల పురోగతిని ఆర్&బీ ఇంజినీర్లు, సంబంధిత కాంట్రాక్టర్లను అడిగి తెలుసుకున్నారు.
రోడ్డు విస్తరణ పనులు పూర్తికావడంలో జరుగుతున్న జాప్యానికి గల కారణాలను అధికారులు అడిగి తెలుసుకున్నారు. పెండింగ్లో ఉన్న పనులను వేగవంతంగా పూర్తి చేయాలని సూచించారు. నిర్మాణ పనులు ఆలస్యం కావడంతో ప్రజలు, వాహనదారులు ఇబ్బందులు ఎదుర్కొంటున్నారని, రోజువారీ రాకపోకలకు అంతరాయం కలుగుతోందని అధికారులు పేర్కొన్నారు. ప్రజలకు ఎలాంటి అసౌకర్యం కలగకుండా అవసరమైన ముందస్తు చర్యలు చేపట్టి పనులను త్వరితగతిన పూర్తి చేయాలని ఆదేశించారు.
రోడ్డు విస్తరణ పనుల సమయంలో భద్రతా ప్రమాణాలను తప్పనిసరిగా పాటించాలని కలెక్టర్, ఎస్పీ సూచించారు. నిర్మాణ ప్రాంతాల్లో ప్రమాదాలకు తావులేకుండా తగిన భద్రతా చర్యలు చేపట్టాలని, వాహనాల రాకపోకలను నిరంతరం పర్యవేక్షించాలని అధికారులను ఆదేశించారు. ట్రాఫిక్ రద్దీ ఏర్పడకుండా అవసరమైన ప్రాంతాల్లో ట్రాఫిక్ నియంత్రణ చర్యలు చేపట్టాలని సూచించారు.
వాహనదారులకు ముందుగానే రోడ్డు పనుల సమాచారం అందేలా సూచిక బోర్డులు ఏర్పాటు చేయాలని తెలిపారు. అవసరమైన చోట్ల బారికేడ్లు ఏర్పాటు చేసి, వాహనాలు సురక్షితంగా వెళ్లేలా చర్యలు తీసుకోవాలని సూచించారు. రోడ్డు పనుల కారణంగా రాకపోకలకు అంతరాయం ఏర్పడే ప్రాంతాలను గుర్తించి, ప్రత్యామ్నాయ మార్గాలను అందుబాటులోకి తీసుకురావాలని అధికారులకు సూచించారు.
సంగారెడ్డి–మదీనగూడ మార్గం ప్రధాన రహదారి కావడంతో నిత్యం భారీగా వాహనాల రాకపోకలు సాగుతుంటాయని, నిర్మాణ పనుల సమయంలో ట్రాఫిక్ నిర్వహణపై ప్రత్యేక దృష్టి పెట్టాలని పోలీసు అధికారులను ఆదేశించారు. పనుల పురోగతిని ఎప్పటికప్పుడు సమీక్షిస్తూ, నిర్ణీత సమయంలో పనులు పూర్తయ్యేలా చర్యలు తీసుకోవాలని సూచించారు.
ఈ పర్యటనలో అదనపు ఎస్పీ చైతన్య రెడ్డి, ఐపీఎస్, ఎస్బీ ఇన్స్పెక్టర్ సదా నాగరాజు, ట్రాఫిక్ ఇన్స్పెక్టర్ రామకృష్ణ రెడ్డి, రూరల్ ఇన్స్పెక్టర్ నాయిముద్దీన్, ఆర్&బీ ఇంజినీర్లు, సంబంధిత రోడ్డు కాంట్రాక్టర్లు తదితరులు పాల్గొన్నారు.