కురవి, ఆగస్టు 17: ప్రజల నుంచి వచ్చే ప్రతి పిటిషన్‌ను నిర్ణీత సమయంలో పరిశీలించి, ఎలాంటి పెండెన్సీ లేకుండా పరిష్కరించాలని జిల్లా ఎస్పీ డా. శబరీష్, ఐపీఎస్ పోలీసు సిబ్బందిని ఆదేశించారు.
సోమవారం కురవి పోలీస్ స్టేషన్‌ను జిల్లా ఎస్పీ ఆకస్మికంగా తనిఖీ చేశారు. ఈ సందర్భంగా పోలీస్ స్టేషన్‌లోని వివిధ విభాగాలు, రికార్డులు, సిబ్బంది విధుల నిర్వహణను పరిశీలించారు.
ప్రజా ఫిర్యాదులపై ప్రత్యేక దృష్టి
ముందుగా రిసెప్షన్ విభాగాన్ని పరిశీలించిన ఎస్పీ, పోలీస్ స్టేషన్‌కు వచ్చే ప్రజల పిటిషన్లు, వాటి పరిష్కార స్థితి, పెండింగ్ వివరాలను అడిగి తెలుసుకున్నారు. ప్రజల నుంచి వచ్చే ఫిర్యాదులను సత్వరమే పరిష్కరించాలని, అనవసర జాప్యానికి తావులేకుండా చర్యలు తీసుకోవాలని సూచించారు.
పోలీస్ స్టేషన్‌లోని CCTNS 2.0, స్టేషన్ రైటర్ విభాగం, ఇతర రికార్డులను పరిశీలించిన ఎస్పీ, సిబ్బంది పనితీరును సమీక్షించారు. కేసులు, పిటిషన్లు, స్టేషన్‌కు సంబంధించిన సమాచారాన్ని CCTNS 2.0లో ఎప్పటికప్పుడు సక్రమంగా నమోదు చేసి అప్‌డేట్ చేయాలని ఆదేశించారు.
సీసీటీవీలపై నిరంతర పర్యవేక్షణ
పోలీస్ స్టేషన్ పరిధిలోని సీసీటీవీ కెమెరాల పనితీరు, కవరేజ్, రికార్డింగ్ పరిస్థితిని ఎస్పీ పరిశీలించారు. సీసీటీవీలు నిరంతరం పనిచేసేలా పర్యవేక్షించాలని, నేరాల నియంత్రణతో పాటు దర్యాప్తులో సీసీటీవీ ఫుటేజీని సమర్థవంతంగా వినియోగించుకోవాలని సూచించారు.
అనంతరం జనరల్ డైరీ, స్టేషన్ రికార్డులు, రౌడీ షీట్లు, సస్పెక్ట్ షీట్లు, పాయింట్ బుక్స్ తదితరాలను పరిశీలించారు. అన్ని రికార్డులను ఎప్పటికప్పుడు అప్‌డేట్ చేసి పూర్తిస్థాయిలో నిర్వహించాలని కురవి ఎస్‌ఐ సతీష్‌కు సూచించారు.
రోడ్డు ప్రమాదాల నివారణకు చర్యలు
కురవి పోలీస్ స్టేషన్ పరిధిలో రోడ్డు ప్రమాదాల నివారణపై ఎస్పీ ప్రత్యేకంగా సమీక్షించారు. ప్రమాదాలకు అవకాశం ఉన్న ప్రాంతాలు, బ్లాక్ స్పాట్ల వివరాలను ఎస్‌ఐ సతీష్‌ను అడిగి తెలుసుకున్నారు.
ప్రమాదాల నివారణకు ముందస్తు చర్యలు చేపట్టడంతో పాటు, అవసరమైన ప్రాంతాల్లో పోలీసుల పర్యవేక్షణ పెంచాలని, వాహనదారులకు రోడ్డు భద్రతపై అవగాహన కల్పించాలని ఆదేశించారు.
మాదకద్రవ్యాలపై కఠిన నిఘా
గంజాయి, ఇతర మాదకద్రవ్యాల నియంత్రణపై కూడా ఎస్పీ ప్రత్యేకంగా సమీక్ష నిర్వహించారు. గంజాయి బీటర్ల వివరాలను సేకరించి వారిపై నిరంతరం నిఘా ఉంచాలని సూచించారు. మాదకద్రవ్యాల అక్రమ రవాణా, వినియోగంపై కఠిన చర్యలు తీసుకోవాలని ఆదేశించారు.
గ్రామాల్లో నిఘా వ్యవస్థ బలోపేతం
విలేజ్ పోలీస్ ఆఫీసర్స్ (VPOs) ద్వారా గ్రామాల్లో పోలీసుల నిఘా వ్యవస్థను మరింత బలోపేతం చేయాలని ఎస్పీ సూచించారు. VPOలు తమకు కేటాయించిన గ్రామాలను క్రమం తప్పకుండా సందర్శిస్తూ, గ్రామాల్లో పరిస్థితులు, నేరాలకు సంబంధించిన సమాచారం, గంజాయి మరియు ఇతర అక్రమ కార్యకలాపాలపై సమాచారాన్ని సేకరించి పోలీస్ స్టేషన్‌కు అందించాలని తెలిపారు.
గ్రామాల సందర్శనలు, 100, 112 ద్వారా వచ్చే కాల్స్, ప్రజల పిటిషన్లపై తీసుకుంటున్న చర్యల వివరాలను కూడా ఎస్పీ అడిగి తెలుసుకున్నారు. గ్రామాల్లో పోలీసుల నిరంతర పర్యటనలు కొనసాగిస్తూ ప్రజలతో సమన్వయాన్ని పెంచుకోవాలని సూచించారు.
ప్రజావాణి పిటిషన్లలో పెండెన్సీ ఉండకూడదు
ప్రజావాణి పిటిషన్ల విషయంలో ఎలాంటి పెండెన్సీ ఉండకూడదని, ప్రతి పిటిషన్‌ను నిర్ణీత సమయంలో పరిశీలించి పరిష్కరించాలని జిల్లా ఎస్పీ డా. శబరీష్ స్పష్టం చేశారు.
ప్రజలకు మరింత సమర్థవంతమైన పోలీస్ సేవలు అందించేందుకు సిబ్బంది బాధ్యతాయుతంగా, అప్రమత్తంగా, నిర్లక్ష్యానికి తావులేకుండా విధులు నిర్వహించాలని ఆయన సూచించారు.